Жаалхүү Карлсон хоёр

Нэг хүүхдийн зохиол биччихье. Бага насныхаа дурсгалд.

Астрид Линдгрен хэмээх олон хүний хүндлэл хүлээсэн Швед авхайн "Дээвэр дээр суудаг Карлсон Жаалхүү хоёрын тухай гурван тууж" гэсэн сунжруу нэртэй энэ зохиолыг амьдралдаа бусад зохиолоос илүү олонтаа уншжээ. Нийтдээ дөрвөн удаа уншиж. Анх дунд сургуулийн 3-р ангид байхдаа уншсан. Салж чадахгүй байж байгаад л дуусгасан даа. Харин хамгийн сүүлд буюу ноднин уншихад жаахан амтгүй байсан. Насны болоод өмнө нь нэг бус удаа уншсаны нөлөө байсан биз.

Энд томоороо гарчихсан байгаа ур муутай зураг бол ноднин яг уншиж дуусчихаад номын санд номын санчийг нь хүлээж байхдаа хавтсан дээрх зургийг нь дуурайж зурах гэж оролдсон юм. Зарим нэг сайтуудад өөрийнхөө хөрөг зургийг (аваатар) болгочихсон ч байгаа. Хаячихад хайран, хадгалахад түвэгтэй санагдаад байхаар нь компьютер руугаа оруулаад авчихсан байсан нь сүүлд олдож билээ.

Карлсоныг ч танихгүй хүн цөөхөн биз. Олон хувилбараар уран сайхны болоод хүүхэлдэйн кино хийгдсэн дээ. Уран сайхны кино нь гоё санагддагүй. Харин хүүхэлдэйн кино нь бол дажгүй болчихсон гэж боддог шүү. Дүрслэлийн талдаа бол гоё.
Youtube - дээр хэдэн анги нь байна лээ. Цувралууд нь бүрэн байж магадгүй. Нягтлан шалгасангүй.
Тэр Карлсоны бандаганаад хөдөлж байгаа, нисч байгаа нь цаанаа нэг эгдүүтэй танхай шүү. Танхай ч гэсэн жудагтай танхай шүү бас.
Хүний юмыг зөвшөөрөлгүй авдаг боловч хулгай хийдэггүй мөнгийг нь "төлдөг" учраас өөрийг шударга залуу гэж боддог. Би ч гэсэн тэгэж боддог. Жаалхүүгийн гэрт нь оройн хоолонд нь уригдаж очоод тавгаар нь нисгэж тоглож байгаад хагалчихаад газар дээр нь ээжтэй нь тавагны "тооцоо"-г нь алдарт 5 эре-гээрээ хийж байгааг дурдахад л хангалттай.

Карлсон гэж ер нь хэн бэ? Байнга л бодогдчих гээд байдаг юм. Хэдэн настай хэний хүү вэ гэж. Нуруун дээрх сэнс нь төрөлхийн үү эсвэл хэн нэгэн мундаг авьяастны гараар бүтсэн үү? Сэнс нь яаж бэхлэгдсэн болоо? Энэ тухай лавшруулж бодмооргүй санагддаг юм. Жаахан лавхан бодмогц л энэ зохиол "худлаа" болчих гээд байдаг юм. Хүүхдийн зохиол ч нялх хүүхэд шиг эмзэгхэн дээ. Хамаагүй гүнзгий тунгаагаад ер нь хэрэггүй. Эвдчихнэ, хир унагачихна. Өхөөрдөж л унших хэрэгтэй.

Карлсон өөрөө болохоор өөрийнхөө тухай өөдтэй юм хэлээгүй дээ. Ээж, аавынхаа нэрийг гээд шал сонин юм хэлээд байдаг. Энд бичихээс ч нэрэлхэнэ.

Байнгын өлсөж явдаг. Өлсөхөөрөө л Жаалхүүг санадаг юм уу даа гэмээр. Сонин хүүхэд. Хэлж байгаа үг нь тэр чигээрээ цэцэн үг. Санаж байгаа хэдээ бичвэл:
  • Чи ер нь 8 лаатай нэг бялуу ээжээрээ авхуулахаар нэг лаатай 8 бялуу авхуулчихаач
  • Үлгэр дээр тэгээд түлээчин улаан малгайтыг тоос сорогчоо олгойлгоод чонын гэдэснээс гаргалаа гэж байдаг юм уу?
  • Карлсон : Аавынхаа төлөө нэг халбага, ээжийнхээ төлөө нэг халбага, Август эмээгийнхээ төлөө нэг халбага...
    Жаалхүү: "Август эмээ гэж чамд байдаг юм уу"
    Карлсон: Байхгүй л дээ.
    Жаалхүү: Тэгвэл Август эмээгийн төлөө нэг халбагыг идэж яах гэж байгаа юм?
    Карлсон: Тэгээд хаа нэгтээ Август гэдэг эмээ байхгүйн төлөө найз чинь турж үхэх болж байна уу?
  • За энд 10 боов байна. Хоёулаа 7, 7-оор нь хуваая. Би өөрийнхөө 7-г авчихлаа. Одоо чиний "7" үлдсэн...
  • Цоожны нүхээр харах муухай гэдэг үнэн. Учир нь зориулалт нь түлхүүр хийх ёстой учраас. Харин энэ бол шагайвч. Хаалганы цаанахыг шагайж харах зориулалттай. Тэгэхээр муухай биш...
Бас муугүй зурчихна. "Гон бие азарган тахиа", "Миний туулайн хөрөг" зэрэг зургууд нь бас л авъяасынх нь цар хүрээг илтгэсэн зургууд :P

Байнга л нэг дэггүйтэх аргаа олчихсон бужигнуулж байдаг нь санаанд оромгүй. Ямар ч тохиолдолд яаж ийж байгаад дэггүйтэх санаа олдог нь мундаг л даа мундаг. Тоочвол ч олондоо олон.

Фрекон Бок гээд муу нэртэй ч гэсэн зохиолыг бүр гоё болгосон нэг дүр байна аа. Бичихгүй байж яавч болохгүй. Ээ дээ зохиолын бас л нэг ноён нуруу шүү. Муухай ааштай гэрийн эзэгтэйн дүр л болохоос :)

Би гэдэг чинь ухаалаг, хөгжилтэй ид гялалзаж байгаа махлаг сайхан залуу шүү дээ... гэж өөрийгөө "рекламддаг" бүдүүн жаалын тухай бичсэнээ ингээд өндөрлөе дөө. Яагаад ч энэ зохиолын тухай олигтой бичиж чадахгүй юм байна. Ямар зохиолоос нь энд бичилтэй биш...

9 comments:

  1. Үзлээ. Баярлалаа. Аргагүй л олны хүндлэл хүлээсэн хүн байсан даа. Линдгрен гуай. Зохиолоор нь олон ч хүн хүмүүжсэн байх.
    Карлсоны Ээжийн бусад "хүүхдүүд" нь бас л "сайн хүүхдүүд" шүү.

    ReplyDelete
  2. Энэ ч бас гайхалтай нийтлэл..

    ReplyDelete
  3. Гайхалтай нийтлэл байна.

    ReplyDelete
  4. Сумьяа6/22/2008 10:50 PM

    Энэ зохиолын жүжгийг Хүүхэлдэйн театр дээр үед тоглож байхад нь үзээд л... олон сайхан дурсамж сэдрээд уйлмаар болж байна Мөнхөө. Номыг нь уншсан гэж худлаа хэлээд юүхэв дээ. Гэхдээ л гайхалтай зохиол гэдгийг нь мэдрээд байдаг юм. Оросууд бас хүүхэлдэйн киног нь зохиолыг нь мэдэртэл сайн хийсэн шүү тиймээ

    ReplyDelete
  5. Тийм шүү. Оросуудын хийсэн хүүхэлдэйн киног л янзтай гоё болсон гэж бодоод байдаг юм. Үзээд байхаар уйдна гэж байхгүй шүү. Дүрслэл зураглал нь яг л хүүхдийн зохиолд таарсан энгийн талдаа.

    Дээр нь Карлсонгийн хоолойг нь бас л гоё оруулсан байгаа юм даа. Цаанаа нэг танхайдуу баргил хоолойгоор ярьж байгаа нь эгдүүтэй шүү.

    ReplyDelete
  6. зохиолыг дахин уншсан юм шиг л боллоо, хэзээ ч хамгийн сүүлд уншлаа... надад ч гэсэн оросуудын хийсэн хүүхэлдэйн кино нь хамгийн гоё санагддаг. 70-аад оны кино байх аа, оросууд мундаг шүү.
    Карлсон шиг бодолтой нэг "ид гялалзаж байгаа махлаг сайхан залуу" хажууд байсан ч болоосой, хорвоо ямар гоё өнгөтэй байх бол ккк

    ReplyDelete
  7. Миний багадаа амтархан уншдаг байсан зохиол доо. Эргээд бүх мартагдсаныг санууллаа. Сайхан бичлэг бичсэн байна. Баярлалаа. Одоо нэг олдвол уншина аа. Миний өмнө эгчийн ширээний ном байсан болохоор эхний болон сүүлийн 10аад хуудас нь дутуу байсан юм.

    ReplyDelete
  8. Карлсон бол тэнэмэл, бидний хэлдгээр гудамжны хүүхдийн дүр, жаалхүү бол ганцаардмал хүү шүү дээ

    ReplyDelete