Аркис и Фаркис - 3

Илүү ухаанаа гээчихмээр л байхсанж

3-р бүлэг
Эхний шөнө
А -- Чи хэн бэ?
Б -- Би сүлд хийморь чинь байна.
А -- Чи тэгээд сүлд юм уу хийморь юм уу?
Б -- Хаха. За за би Билигт өвгөн байна аа.
А -- Өө сайн уу. Таны тухай Аргат өвгөнөөс дуулсан юм байна.
    . . .
Б -- Чи юу асууна, түүний чинь хариулт хаа сайгүй байдаг гээгүй бил үү? Фаркис чамд хайртай эсэх, хариулт нь чамд харагдаж байгаа юм уу.
А -- Харагдаж л байна. "Фаркис үнэндээ Аркист хайртай л даа"
Б -- Тэгээд?
А -- Юу тэгээд гэж?
Б -- Тэгээд чамд хайртай л юм байна шд.
А -- Би энэ хариултыг ойлгохгүй байгаа юм.
Б -- Ойлгох гэсний хэрэггүй дээ, эргэлзэх ч хэрэггүй, чи Фаркис дээр очих хэрэгтэй.
    . . .
А -- Чи намайг аргадаад надтай ярилцаад байгаа юм биш байна. Хэрвээ надтай үнэхээр ярилцаж байгаа бол үргэлж ярианы туршид биш юм аа гэхэд ядаж нэг удаа өөртөө эргэлзмээр юм. Чи ерөөсөө л над руу нэг л сэжимээр дайраад, надаар нэг л юм хийлгэх гээд зүтгээд байна. Чи намайг Фаркис дээр очуулах гээд л байна шүү дээ. Харин тэгсэн хэрнээ чи надаас юу ч сонссонгүй. Яриаг минь сонссон хэрнээ, яг өөрийнхөө зүтгүүлээд байгаа сэдэвтэй харгалдсан хэсэг дээр л учир өгөн яриаг эргүүлж байна. Яаж би чамд итгэх юм. Чи надтай ярилцаад, би чиний яриагаар, чи миний яриагаар сэлбэгдээд, ярих зууртаа бодож, бодлоо өөрчилж, алхам тутамдаа өөрчилж тэгэж ярих учиртай биш үү?
Б -- ...
А -- Тэгэхлээр чи нэг бол адгийн тэнэг, аль эсвээс миний өөрийн бодлын өчүүхэн нэг хэсэг байна.
Б -- ...
А -- Хаха. Яасан? Би таачихсан уу. Төгцөг өө чи ч гэнэн матери юм даа.
Б -- Баярлаж байгааг нь ээ. Чи өөрөө гэнэн матери. Би матери биш... тийнхүү хэлээд орчиндоо замхран уусаад алга болов.

Өглөө нь Аркис сэрээд элдэв юм зүүдлэгдээд энэ лав сайн ёр биш гэж бодов. Ер нь дэмий юм зүүдэлбэл санаа эргэж, сайн юм зүүдэлбэл түүндээ хөөрөн хөвсөлзөх тул зүүд намжтал хүлээе гэж бодов.


Удаах шөнө
А -- Уйтгартай байна шүү.
Б -- Уйдаж сурах хэрэгтэй.
А -- Аль хэдийн сурчихсан.
Б -- Сурчихсанаа давтаад л байна уу.
А -- Давтах ямар ч урам алга даа. Уйдахад минь, уйтахад минь уянга байсан, хөг байсан. Одоо аль аль нь алга. Дуусчихсан бололтой. Үнэхээр уйтгартай байна. Уйтгар минь үргэг цааш, урин шуугиан бүчиг нааш. Адал сонинд хутгалдая ийш, амьдрал даллаж байна тийш. Уйтгарлан цагираглаж ханалаа, үнэхээр сайхан уйтгарлан ханалаа. Одоо харин үүнээсээ уйдчихлаа...


3 дахь шөнө
Б -- Хайрын дор 2 хүн учран золгоход өөрснөө мэдсэн ч, эс мэдсэн ч, тэр нь хэдхэн агшин ч байсан хамаагүй амьдралд нь агуа их амьдралын тэнцвэр бууж ирдэг. Төрөлхөөсөө бол эр хүн хувь заяагаа атгаж мэдэж явдаг. Эм хүн жамыг дагаж мэдэрч амьдардаг. Хүү минь жам ёсыг таних замдаа оржээ чи. Бүү ай. Бүсгүй дээрээ оч. Жамыг хүндлэн дага. Тэгэвч заяагаа гартаа атга. Жам, заяа хоёроо андууран будилж, хүлцэхгүйг хүлцэх хэрнээ, сөрөхгүйг сөрж явбал түүнээс тэнэггүйг чи лав гадарлахаар болсон. Бүсгүй чинь ч энэ зуур хувь заяагаа залан мушгиж үзсэн байгаа. Аль алины чинь аялал дууссан. Учран золго.
А -- Хмм. Аль хэдийн очихоор болсон биш үү, очихын хооронд юун их ятгалга билээ энэ чинь? Арай очихгүй тухай бодол хаа нэгтээ маань байгаа болоод түүнийг далдлах гэхдээ өмнүүр нь та нар бөртөлзөөд байна уу айн? Ай чи гарч ирэгтүн тэр хулчийх сэтгэл! тийнхүү хэлэхэд олон бүгдээр ярагдан, нэгэн бодол цухуйн илрэв.
А -- Хайрт бүсгүй дээрээ очихоос юунд чи айн хулчийв. Өч! гэж хэлж дуусахад өөрийгөө түшлэг тохойлдоод, шанаагаа тулан сэнтийн дээр суун байгаагаа анзаарав.

-- Чи бүсгүй хүний тухай болоод, бүсгүйнхээ тухай тун болхиор бодож байна. Чухамдаа юу ч бодохгүй байна. Юу ч бодохгүй байх чинь нэг талын зөв. Элдвээр засах, голох бодол чамд огт төрөхгүй. Нөгөө талаас чи түүний талаар юу ч мэдэхгүй байна. Хорвоо дэлхий дээр хоёулхнаа хорь гучин жил зүв зүгээр амьдарч байгаад хоорондоо учирсан шиг бодох юм. Урьдаар ойр зуур нь төвхнөөд, санаандгүй учирсан мэт тохиолдолыг бэлдээд, хэдэнтээ тийнхүү тааралдаад байр байдлыг нь ажаад бага багаар ойртвоос дээр биш үү. Гэнэт харайн очиход чинь "ай чи минь ирэв үү" хэмээн тосон авахгүй нь лавтай.
А -- Санааг чинь ойлгов. Тун ухаалаг үг байна. Гэвч... Гэнэн танхил явсан үе бий, гэхдээ одоо чиний санаагаар хийх гэвээс яхир өвгөн гэнэн охиноор оролдох мэт болчих биш үү. Юунд ч үл итгэх хашир яхир өвгөн бай гээ юу чи... Хмм. (эргэлзэв) За ямар боловч чиний үгэнд хүч байвч, минийхэд тийм юм алга. Үгийг чинь няцаан сөргүүлж чадахгүйгээ мэдэв. Гэвч аль үг бүрийг няцаан сөргүүлэх билээ. Энэ удаад зөн мэдрэмж маань очихыг сонгов.

Тэгээд дахин нэг хоногийг өнгөрөөхөд шөнөдөө элдэв зүүдэнд үймэгдсэнгүй. За учрах өдөр тохиол маань ирэв бололтой гээд тэр өдөртөө Фаркис дээр хүрч очихоор базаав.

Гарахаасаа урьдаар "хайранд бүхнийг даатгачихвал, хайрандаа мансуурчихсан байвал ганцаар жарган дэмийрэвч Фаркисыгаа аварч чадахгүйд хүрнэ. Тиймээс багахан ч гэсэн заль, ухаан хэрэгтэй. Харин дараа нь хайр өндийхөд заль, ухаан 2 зайгаа тавьна" гэж бодов. "Тийм ээ, заль... Ухаанд нь тавих урхи илүүдэхгүй ээ" гэж дахин бодов. Тэгээд доорх зурвасыг бичээд Фаркис руу хүргүүлэхээр илгээгээд, өөрөө хойноос нь замдаа гарав:
"Би чамайг удаан хүлээлээ. Би ч яахав дахиад хэр бол хэр удаан хүлээх байх. Бие минь харин хүлээж цөхлөө. Биетэйгээ муудалцаж болохгүй. Хөлөгтэйгээ муудалцаж болохгүй. Биетэйгээ муудалцчихвал юу хөлөглөн явах. Тиймийн тул биетэйгээ найрыг бодож биеээ цэнгүүлэхээр одлоо."